أين بطل مسلسل الحشاشين؟.. ناقد فني يتساءل!
4 د
مسلسل الحشاشين لا يزال الأكثر تعرضًا لحالة الجدل والانتقادات على صفحات السوشيال ميديا، مع انطلاق ماراثون دراما رمضان 2024، ما بين حالات المغالطات التاريخية وتعليقات صناعه.
تساءل الناقد الفني أندرو محسن مؤخرًا، عن بطل مسلسل الحشاشين، والذي يتلاشى وضوح موقفه واَرائه ما بين شخصيات العمل، كذلك الخطوط الدرامية التاريخية المتداخلة بدون مدلول قوي يربط بين الأحداث.
نشر "محسن" من خلال صفحته الرسمية على موقع التواصل الاجتماعي "فيسبوك"، كاتبًا رؤيته خلال الأسبوع الأول من عرض مسلسل الحشاشين: "البطل في الحشاشين، هل هو موجود في المسلسل فعلًا ولا في أذهان صناعه فقط؟".
يتابع: "اللي بيتابع قصة حسن الصبّاح ورحلته لتأسيس جماعة الحشاشين الشهيرة، مش هتكلم على الدقة التاريخية لأن أولًا العمل الفني مش كتاب تاريخ، وثانيًا لأن الشخصية مختلف عليها في المراجع، خلينا في اللي شفناه. صناع المسلسل بيتعاملوا على أساس إن المشاهد عارف إن حسن الصباح شخصية ذات تأثير كبير".
يضيف: "وعنده معلومات عنها بالفعل، وبالتالي إحنا مش محتاجين نقول ده في المسلسل! أكتر من حاجة خلال الحلقات بتتعامل مع الشخصية على إنها مهمة وكبيرة وليها هالة، بس إحنا فعليًا مش شايفين ده بشكل حقيقي في الأحداث، باستثناء مشهد السفينة".
يصف مستعرضًا الأحداث: "في الحلقة الأولى حسن نفسه بيقول إنه لسه بيبحث، وإنه صعب حد يعرف حقيقته. مبدأيًا ده مش واضح للمشاهد، مفيش حاجه تقول إنه لسه بيبحث، أو عنده حالة حيرة، ولا حاجه تقول العكس، إن هدفه واضح وبيسعى ليه".
يستكمل: "الغرابة تزداد لما حسن يقابل شخص اسمه ابن عطاش، وبغض النظر عن إننا مش بنعرف من الأحداث قيمة ابن عطاش نفسه، فإننا بنشوف إن الشخص ده من أول مقابلة بيثق في حسن وبيعمل عهد بينهم، دون أي إشارة حقيقية على الشيء اللي ممكن يكون لفت نظر ابن العطاش في حسن بسرعة كده!".
يتابع: "الحلقة التانية بنشوف فيها المعجزة اللي ملهاش تفسير عن معرفته لحلم أم المستنصر بالله، ثم شفاؤه ليها، هل معناه إن حسن عنده قدرات سحرية؟ شفت حد كاتب ما هو ممكن يكون سمع الحلم من حد، تمام بس ده ماظهرش في المسلسل، ومش مطلوب من المشاهد يملأ الفراغات، وده حدث فات عليه حلقتين بالفعل".
ثم يتساءل: "في المقابل مثلًا إحنا بنشوف إنه لما بيدّعي إنه هدأ العاصفة هو في الحقيقة بيستعين بالعلم من خلال قراءة كتب عن مواقيت الريح والعواصف، فهل هو رجل ذو قوى خارقة ولا شخص حاد الذكاء وبيتسخدم العلم؟ وطبعًا المعجزة اللي في الحلقة التانية دي ماشفناش تأثيرها غير في إنه بيقابل الخليفة المستنصر، اللي بيطلب من بدر الدين الجمالي ياخد باله منه مش أكتر، يعني برضه مش بنشوفه تحول لرجل ذو نفوذ بشكل لافت".
يستكمل: "موضوع البطل اللي بلا أماره، لكن الشخصيات مؤمنة بيه بيظهر أكتر في الحلقة الثالثة. بنشوف إن بدر الدين الجمالي بيقابل حسن وبيساومه على الإبقاء على حياته في مقابل إنه يبعت رسايل تنفي مظلومية نزار بن المستنصر بالله. ده كلام جميل، المشكلة إننا مش بنشوف إيه هي خطورة الرسايل أصلًا اللي تخلي الجمالي اللي معاه السلطة والقوة يخاف منها، وبالتالي كان المشهد كأنه بيستكمل صورة بطل جوه أذهان صناع المسلسل فقط".
يتابع مستعرضًا الأحداث: "في الحلقة الرابعة، وهي إن نظام الملك شايف إن الدولة السلجوقية عندها مميزات كتير، لكن ينقصها فقط حسن الصباح وعمر الخيام! وطبعًا مش محتاج أقول إن عمر الخيام في المسلسل وضعه أسوأ كمان من حسن الصباح، وبالتالي الجملة دي ملهاش أي معنى حقيقي.
يفسر: "لكن المعنى يتوجد لاحقًا من خلال الحوار، لما نظام الملك بيشرح للسلطان إن حسن ذو عقل عظيم، وهيعمل أي حاجه عشان يثبت ولاؤه. طب عقله العظيم ده، عظيم في إيه تحديدًا يفيد المملكة؟ حتى لما بنشوف السلطان بيُعجب بيه، بيكون إعجابه بالولاء مش بحاجه حقيقية بيقدمها الصباح، في مقابل مثلاً حاجة واضحة وملموسة مثل الحسابات اللي قدمها عمر الخيام".
يختتم: "حاجه أخيرة غريبة في الحلقة الرابعة، هي إن أغلب مشاهد حسن الصباح ونظام الملك، هي عبارة عن قلق وتحذيرات من الأخير للأول، وتهديد إن لو حاول يدعو لمذهبه (الشيعي) في الدولة السلجوقية هيتعاقب. طب طالما إن قلقك منه أضعاف المميزات اللي إنت شايفها فيه، يبقى اخترته ليه وقلت إن المملكة ناقصة الشخص ده تحديدًا؟ يمكن نظام الملك عارف حاجة مميزات مهمة عن حسن بس أنا شخصيًا مش قادر أشوف المميزات دي".
الحشاشين
تدور الأحداث حول حياة وصراعات وتحديات زعيم الحشاشين “حسن الصباح”، الذي ينضم إلى المذهب الإسماعيلي في عُمر الـ 17 عامًا، ثم يسافر إلى مصر ويظل بها 3 سنوات، ويتنقل بين القاهرة والإسكندرية.
إلى أن يحدث خلاف بينه وبين أمير الجيوش “بدر الدين”، الذي يقوم بسجنه ثم طرده على ظهر سفينة كانت في طريقها إلى شمال إفريقيا، تغرق وينجو منها “الصباح”، ويسافر إلى أصفهان في إيران، ثم يختار لنفسه مكانًا حصينًا حتى يكون بعيد عن أعين أعدائه، والعيش في قلعة يطلق عليها “قلعة الموت”، حيث ترتفع عن سطح الأرض بحوالي 6000 قدم، والطريق إليها منحدر وصعب الوصول له.
انتهى المخرج بيتر ميمي من تصوير مشاهد كثيرة داخل مصر وخارجها كدولة كازاخستان من المسلسل الذي يعد الأضخم إنتاجيًا في شهر رمضان 2024. ومن المقرر سفر فريق عمل مسلسل “الحشاشين” إلى أوروبا وتحديدًا لجزيرة مالطة في شهر ديسمبر 2023 لتصوير بعض المشاهد الخارجية للمسلسل.
عرض المزيد
مناسب من عمر 4 سنوات فما فوق.
إنتاج
2024
إخراج
بيتر ميمي
بطولة
النوع
أحلى ماعندنا ، واصل لعندك! سجل بنشرة أراجيك البريدية
بالنقر على زر “التسجيل”، فإنك توافق شروط الخدمة وسياسية الخصوصية وتلقي رسائل بريدية من أراجيك
عبَّر عن رأيك
إحرص أن يكون تعليقك موضوعيّاً ومفيداً، حافظ على سُمعتكَ الرقميَّةواحترم الكاتب والأعضاء والقُرّاء.
