“أجرأ من ممثل فشل فلَزَم جحره”.. محمد رمضان يتصدر تريند السوشيال ميديا بسبب “جعفر العمدة”!

تصدر الفنان محمد رمضان تريند مواقع التواصل الاجتماعي لعدة مرات متتالية خلال الأسبوع الأول من شهر رمضان الفضيل لهذا العام، مع انطلاق عرض أحدث أعماله الدرامية مسلسل "جعفر العمدة".

نال النجم المصري إشادات جماهيرية ونقدية على مستوى الأداء التمثيلي المقدم في "جعفر العمدة" بجانب الاحترافية في التنفيذ على صعيد التأليف والإخراج والتصوير والإنتاج؛ إذ وصفه البعض بالعودة لتألقه مجددًا بعدما أخفق في تجاربه بالدراما الرمضانية خلال العام الماضي.

كتبت الناقدة إسراء إمام رأيها الفني في "جعفر العمدة" من خلال حسابها الرسمي على موقع التواصل الاجتماعي "فيسبوك"، كاتبة: " المفارقة إن "محمد رمضان" أكتر فنان شاب حاول حقيقي في السنين اللي فاتت مش إنه يقدم حاجة مختلفة وبس، لأ حاول يقدم فن".

توضح: " البداية كانت من مسلسل "موسى" اللي إخراجيًا تميز جدا، واللي صحيح كان فيه من كليشيهات شخصيات رمضان وعالمه، لكن يُعتَبر محاولة للخروج من جلده بشكل ما، ورغم إن "موسى" ماحققش النجاح الجماهيري، السنة اللي بعدها "رمضان" راح مسلم نفسه لـ "محمد ياسين" بجلالة قدره، سلم نفسه حرفيا، وكأنه كان عاوز يشتغل شغل فني بيور، بعد ما السوشيال ميديا استقبلت "موسى" بحفاوة على المستوى البصري، لكن برضه للأسف مسلسل "المشوار" كان مسخ غريب لا له طعم ولا ريحة ولا لون".

تتابع: " "محمد رمضان" أجرأ بكتير من ممثلين متقدرين وبيتبصلهم بإنهم أرقى من "رمضان" بمراحل، أجرأ مثلا من "مكي" اللي قلت وهافضل أقول إنه أجبن ممثل في جيله والجيل اللي بعده، شخص ماعرفش يتعامل مع الفشل، فشل مرتين فراح لَزَم جحره، وماخرجش إلا بأمر عشان دور في "الاختيار"، ولما بعدها بدأ يستعيد علاقته بالناس، استغل ده بإنه يعيد إنتاج "الكبير"، وقضيتي هنا مش إن "الكبير" حلو ولا وحش، قضيتي إني مش مستوعبة خالص استسهال "مكي"، وانتحاره فنيًا بالشكل ده".

تضيف: " الفكرة إن "رمضان" أشجع وأوضح من ممثلين كتير، ممثل مابيدعيش إنه بيفهم أو بيميز مدى جودة اللي بيقدمه، ولما حب يروح لحتة عالية فنيا، اعتمد على أسامي المفروض إنها هاتحققله اللي هو كان حابب يعمله، لكن الأسامي دي خذلته، فهو دلوقتي بيمارس شجاعته المعتادة، وبيرجع لمنطقته الواضحة اللي غايتها المتعة والتسلية فقط لا غير، لإنه حاليا محتاجها".

تختتم: " "جعفر العمدة" مسلسل مُسَلّي ومابيضحكش عليك في اللي بيديهولك، بيحكيلك حدوتة مصاطب لابسة جلاببة وفي إيديها كوباية شاي، عاوزاك ماتركزش أوي إن أبو رجل مسلوخة مش هايعرف يمشي من أساسه، ولا تسأل أمنا الغولة بقت غولة ليه، عاوزك تحب الحكاية وتتسلى بيها في وقت إنت محتاج تتسلى فيه وخلاص".

يذكر أن مسلسل "جعفر العمدة" للمخرج محمد سامي، يشارك ببطولته نخبة من الفنانين المصريين؛ من بينهم: زينة، ومي كساب، وهالة صدقي، و إيمان العاصي، ومنة فضالي، وأحمد فهيم، وعصام السقا، وبيومي فؤاد.